En il lieu nua che la nova punt vegn bajegiada, cruschan pliras sendas per viandar ed ir cun velo la via chantunala. Qua fa la via chantunala ina leva storta sur ina mutta ora, il lieu n’è betg propi survesaivels e lubida è ina sveltezza da 80 km/h.
Passagi daventa pli segir
Ils ultims 10 onns hai dà bunamain 50 accidents a Staderas. Enfin uss stuevan peduns e velocipedists traversar la via chantunala. La punt nova vegn a manar els sur la via chantunala or e far uschia il passagi pli segir.
Custs da radund 920'000 francs
La punt custa rodund 920’000 francs. Ella ha ina lunghezza totala da 115 meters e vegn bajegiada cun lain da plantas derschidas sin il territori da la vischnanca da Laax. Utilisà vegn lain da pign e da laresch.
Il vial da la punt è 2,5 meters lad e vegn cuvert cun catram per far el pli segir sch’i plova. L'entira punt ha ina pendenza maximala da 6% ed è uschia era adattada per persunas cun impediments.
