Sisum il territori da skis da Breil Vuorz Andiast, sin il Fil, duain vegnir construidas 6 rodas da vent verticalas. Quai è la finamira d'in project da la firma MBRsolar SA da Wängi tranter Winterthur e S. Gagl. La MBR solar è ina firma spezialisada sin cundrez fotovoltaics. Il mesirader da vent che vegn installà registrescha la fermezza e la direcziun dal vent sin ina autezza da 16 e 30 meters, sco il manader dal project Thomas Cadonau da la MBRsolar SA ha infurmà. Ils custs da var CHF 10’000.- per il mesirader e per la montascha da quel surpiglia la MBRsolar SA. Il mesirader duai restar en funcziun durant circa 1 onn.
Lieu adattà
Tenor il maina project Thomas Cadonau è il lieu sisum il territori da skis in dals paucs lieus en Svizra cun avunda vent per producir energia. Planisà èn maximal 6 rodas da vent verticalas (mira maletg) cun ina autezza da circa 30 meters. Quellas hajan plirs avantatgs cumpareglià cun rodas da vent classicas cun in propeller:
- ellas èn pli levas e pon vegnir transportadas cun in helicopter
- ellas na fan betg tant canera
- ellas n’èn betg uschè privlusas per utschels
- ils custs da producziun èn pli bas
Pervia da tut quels avantatgs spera Thomas Cadonau che i na dettia betg bler vent cuntrari da la vart da las organisaziuns d'ambient. Era duess i esser pli simpel da survegnir la lubientscha da construcziun.
Reacziuns positivas
Il project è vegni preschentà mesemna saira ils 23 da mars a Breil a la populaziun. Represchentants da la MBRsolar sco era dal producent da las turbinas da vent han mussà differents aspects dal project. Era èn vegnidas discussiunadas differentas dumondas criticas pertutgant la protecziun d’ambient e d’animals.
Las respostas dals iniziants han dentant persvas e las reacziuns èn stadas per la gronda part positivas. Il project saja dentant anc en sia fasa iniziala, la planisaziun detagliada possia per vegnir fatga cun ils resultats d’ina mesiraziun da vent, manegia Thomas Cadonau.
Fin settember 2017 en funcziun
La planisaziun da temps per quai project è fitg stretga. Sch’ils resultats da la mesiraziun da vent èn positivs, vulan ils iniziants avair segirà la finanziaziun enfin la fin favrer 2017. Durant la stad 2017 duajan las turbinas vegnir montadas ed ir en funcziun il pli tard la fin settember 2017.