Siglir tar il cuntegn
Inhalt

Surselva Emprima part dal STENNA Center è finida

Il tunnel che maina il dutg Flem sut il nov bajetg ora è finì. In tunnel pli grond ch’il tunnel da sviament da la via chantunala sut il vitg da Flem.

Peter Heuscher en il tunnel.
Legenda: Las dimensiuns dal tunnel èn impressiunantas. RTR, C. Albin

Il STENNA Center che vegn bajegià sper la punt Stenna, la gronda punt amez Flem, duai colliar las duas parts da Flem. Il plazzal è in dals pli gronds plazzals dal Grischun. Bunamain 170 milliuns francs vegnan investids. Il center finì porscha ina surfatscha totala da 275'000 m2 (dapli che 30 plazs da ballape) e bunamain 1'300 parcadis.

Sguard en il tunnel cun stgalims per ils peschs.
Legenda: Sguard en il tunnel cun stgalims per ils peschs. RTR, C. Albin

Auas grondas n'èn nagin problem

Il nov tunnel è 10 meters aut e ha ina largezza da 10 fin 12 meters. Cun el vegn il tunnel sut la chasa da parcar existenta prolungà per rodund 40 meters fin sut la punt Stenna. Il tunnel saja 5 meters pli auts che quai ch’il chantun haja pretendì. Grazia a quellas dimensiuns na duessan auas grondas betg esser in problem, manegia il maina project Peter Heuscher.

Il maina project Peter Heuscher avant il tunnel.
Legenda: Il maina project Peter Heuscher. RTR, C. Albin

1’500 tonnas sur il tunnel

Spezial vi dal tunnel è tenor Peter Heuscher era, ch'il punct cun la pli gronda paisa da l’entir bajetg sa chatta gest amez sur il tunnel. Ina paisa da 1'500 tonnas, tant sco circa 5 jumbo-jets. Per supportar quella paisa è vegnì construì ina trav da betun armà da 3 meters grossezza, la pli gronda trav da l’entir bajetg. Tut quellas lavurs da construcziun èn vegnidas fatgas l’enviern, cura ch’il dutg Flem maina pauca aua. Avant da cumenzar cun las lavurs, haja il survegliader da pestga pestgà ora tut ils peschs.

Ina pretensiun dal chantun saja era stà, ch'il vial dal Flem resti natirals per ch'ils peschs possian vinavant nudar dal dutg si. Sper integrar stgalims el dutg per crear ina sort stgala da peschs, vegnan era las rivas anc modelladas cun glera, terratsch e crappa pli grossa.

RR actualitad 07:00