Il Tudestg Joseph Hess, che fa in maraton da nudar dal Rain giu ha retard sin ses urari per arrivar a la sbuccada dal Rain. Dus dis saja el en retard, pervi d'in infect dal tract digestiv e causa ad in defect da la bartga d'accumpagnament. Quai ha il scienzià da 35 onns ditg a l'agentura da novitads DPA. E nua ch'il current da l'aua manca, pervi da las sclusas, haja num nudar senza fin. Tut ils 1'200 kilometers dal Rain vul il Tudestg far aifer 25 dis, quai che fiss in record.
Il Tudestg Joseph Hess ha cumenzà al Lai da Toma in maraton da nudar. El vul nudar ils 1'200 kilometers davent da la funtauna fin la sbuccada dal Rain. Quai be en 25 dis – tge che fiss in record. L'um da 34 onns vul nudar 8 fin 10 uras a di, dentant laschar davent ils lieus ils pli privlus, sco per exempel la Cascada dal Rain. Uschia vul el cuntanscher la fin dal mais la Mar dal Nord a Rotterdam.
Il sulet quità che Hess haja gì saja il livel bass da l'aua en il Rain. Gist l'emprima part tras las alps saja perquai pli privlusa ed el saja vegnì cusseglià da purtar protecturs, per exempel vi da la schanuglia, per uschia betg sa blessar vi da crappa al palantschieu. Accumpagnà vegn Hess da pliras canutas e canuts.
Gia rimnà experientscha
Per Hess n'è quai betg l'emprima tala aventura. Uschia è el gia nudà la part tudestga da la Elbe. Quai èn radund 625 kilometers en 12 dis. Il viadi fa el tranter auter er per la perscrutaziun. Uschia rimna el differentas provas d'aua per las universitads a Leipzig, Chemnitz, Mittweida e Furtwangen en Germania. Questas provas duain mussar co il stadi dal flum è sa midà ils ultims onns. I vegn er filmà per ina documentaziun.
Experts averteschan dentant imitaders: Da principi vala ch'il nudar en il Rain è privlus ed è er explicitamain scumandà en tscherts lieus. Il current ed er il tschitsch chaschunà entras ils bastiments sajan in ristg nuncalculabel er a la riva dal Rain. Hess po be far quest viadi perquai ch'el ha survegnì ina lubientscha speziala cun cundiziuns.