Siglir tar il cuntegn

Header

Navigaziun

Legenda: Guardar il video Festa da tir chantunal 2018. Durada 02:41 minutas.
Or da Telesguard dals 16.11.2017.
cuntegn

Surselva En var in mais pon ins s'annunziar per la Festa da tir chantunala

Davent dals 15 da december pon tiradurs e tiraduras s'annunziar online per la Festa da tir chantunala da l'auter onn en Surselva. Ils organisaturs quintan cun bleras annunzias gia ils emprims dis.

Hubert Tomaschett dal comité d'organisaziun quinta gia l'emprima emna cun 2'000 fin 3'000 annunzias. La raschun da s'inscriver baud per la Festa da tir chantunala è ch’ils tiradurs pon lura segir anc eleger sin tgenin dals 14 stans ch'els vulan sajettar.

Hubert Tomaschett (san.) cun Barbara Janom-Steiner (patrunadi) e Marcus Caduff (pres. co).
Legenda: Hubert Tomaschett (san.) cun Barbara Janom-Steiner (patrunadi) e Marcus Caduff (pres. co). RTR, Carlo Albin

Resultats direct en il center da la festa

Che tut ils resultats dals 14 stans vegnan tramess simultan en il center da contabilitad a Rueun è in novum da la Festa da tir chantunala. La secunda ch'ina tiradura ni in tiradur sajetta, vegn il resultat era registrà a Rueun. Ils responsabels dal comité d'organisaziun han uschia adina la survista betg mo dals resultats, ma era en tge stans ch'i vegn anc sajettà e nua ch'i dat anc schibas libras.

Il tir chantunal cumenza ils 15 da zercladur 2018 e dura fin l'emprim da fanadur. Ils organisaturs quintan cun 6'000 fin 8'000 tiraduras e tiradurs durant questas duas emnas.

Il center da l'organisaziun da la Festa da tir chantunala è a Rueun en l'anteriur deposit da militar. Sajettà per la medaglia creada da l'artist Rudolf Mirer vegn davent da Flem fin a Sedrun, e da Versomi fin a Val S. Pieder.

RR novitads 12:00+