Ils 28 da mars 2023 è vegnì mess en funcziun a Sedrun l’implant da test fotovoltaic en il territori da Cuolm Val. Il project SedrunSolar duai garantir en il futur il provediment da la vischnanca da Tujetsch cun energia regenerabla e surtut cun ina gronda part dal current d’enviern.
Cun il project vul «energia alpina» sviluppar sin ina surfatscha da circa 180’000m² in project d’energia fotovoltaica. La surfatscha sa chatta tranter ils rempars da lavinas Scharinas e la sutgera da Val Val – Cuolm Val sin il territori da skis da Sedrun. L’implant cun ina prestaziun planisada da ca. 17 megawatt peak ed ina producziun annuala da radund 23 uras gigawatt cuvra il basegn d’electricitad da la vischnanca da Tujetsch u il basegn da ca. 5'000 chasadas.
L'implant da test furnescha datas per il futur
L’intent da l’implant da test è da rimnar datas durant ils proxims mais da stad e d’enviern davart la construcziun e davart il manaschi. Medemamain duai la moda da montascha previsa vegnir testada tar differents eveniments meteorologics, sco er vegnir examinà l’effect per la biodiversitad locala. Las datas obtegnidas s’integreschan en il design definitiv da l’implant fotovoltaic.
La construcziun da l’implant da test cun trais retschas modularas concedidas ina davos l’autra è l’emprima da quest tip da construcziun en Svizra. Quella moda da construir duai vegnir applitgada sin l'entir implant. Sco proxim sto la populaziun dar glisch verda al project, silsuenter spera la vischnanca da pudair inoltrar la dumonda da bajegiar tar il chantun sin la fin da l'onn.
