Sco il president dal comité d’organisaziun da l'Open Air Norbert Cavegn ha ditg survegnan ils possessurs da nov ina summa fixa per dar a tschains lur terren e per las lavurs da mantegniment. Fin ussa vegniva constatà mintg'onn ils donns ed alura pajà quels als purs. La nova summa fixa saja pli auta che la summa media dals davos onns, ha ditg Cavegn ad RTR. La nova cunvegna è valaivla per 5 onns cun ina opziun sin ulteriurs 5 onns.
Custs fix en il budget
Norbert Cavegn na sa anc betg dir, sche l’Open Air Lumnezia sto spargnar en in auter lieu pervia da la nova cunvegna. Ils custs per las bands hajan ina pli gronda influenza sin il budget, e quels custs na sajan anc betg definids. Il grond avantatg saja, ch’els hajan uss ina summa fixa el budget e na stoppian betg spetgar enfin la fin da l’open air per savair ils custs da restabilir il terren.
Survegliader per incumbensa dals purs
Plinavant vegn in survegliader per incumbensa dals purs a controllar la construcziun e la demontascha da las installaziuns da l’open air. Sia funcziun saja da mirar, che il terren na vegnia betg donnegià memia bler entras maschinas memia grevas sin l’areal.
RR novitads 12:00