Sulet dus fin trais scolars da la scola media hajan mussà interess da frequentar quest onn ils roms d’informatica facultativs, ha ditg il manader da la Scola media Surselva, Marcus Beer. Betg sco davos saja il pitschen interess d’attribuir a la decisiun dal cussegl grond che n’ha betg lubì d’introducir ina scola media d’informatica a Glion. Tar la Scola media Surselva n’han ins dentant betg dà si la speranza da pudair svegliar l’interess per la scolaziun da basa da programmar e sviluppar applicaziuns tar las giuvnas e giuvens. Sco ch'il manader da la scola, Marcus Beer di, dovria quai temps dad etablir ina tala purschida. Ideal fissan quatter fin tschintg scolars per onn.
Avrir il spectrum da participants
Quest atun vul la scola far ina campagna da marketing per che la purschida daventia enconuschenta. Vinavant vegni dà la pussaivladad als scolars che fan il dieschavel onn da scola en la scola Vinavon a Glion ed a persunas creschidas da far questa scolaziun. Cun questas mesiras hajan ins quest onn 7 fin 9 scolars che visitan las lecziuns facultativas d’informatica.
A la tschertga d’in diplom
Damai ch’i n’è betg pussaivel da manar ina scola d’informatica ch'avess era pussibilità in diplom renconuschì en l’entira Svizra, èn ins ussa londervi da tschertgar in'autra soluziun. Sco quai che Marcus Beer di, saja la finamira da pudair porscher la pussaivladad da serrar giu la scolaziun cun in diplom da SIZ (Schweizerisches Informatik-Zertifikat).