Siglir tar il cuntegn

Header

cuntegn

Surselva Erwin Vincenz ha tegnì la dira

Il cumenzament n’è il veterinari Erwin Vincenz betg vegnì prendì serius cun sia medischina omeopatica. Uss è el nominà per il premi Bio-Grischun.

audio
Mezdi: Erwin Vincenz - 25 onns engaschi per medischina omeopatica
ord Actualitad dals 12.02.2016.
laschar ir. Durada: 2 minutas 58 Secundas.

Cumenzà cun la medischina omeopatica ha il veterinari Erwin Vincenz perquai ch’i deva tar la medischina da scola strusch medicaments per las naschientschas. El haja lura vis che l’omeopatia haja gidà e perquai haja el fatg e fetschia anc oz scolaziuns sin quest sectur.

Dapi 25 onns dovra Erwin Vincenz la medischina omeopatica mintga di. Tut tenor cas dovri el la medischina omeopatica, la medischina da scola ubain era omaduas. Cun ils onns saja l’experientscha e la savida creschida uschia ch’el dovria adina pli pauc la medischina da scola.

Il cumenzament n’è betg stà simpel

«Avant 25 onns na vegniva jau betg prendì serius» di Erwin Vincenz. Ussa saja quai dentant sa midà in pau. El haja constatà che gist en Surselva saja la medischina omeopatica sa derasada pli ferm ch’en auters lieus. Quai sajan franc era uschia pervia da ses impuls manegia Erwin Vincenz. Che persunas ch’eran cunter in tractament omeopatic midan tuttenina opiniun ed il fatg ch’el saja nominà per il premi Bio-Grischun sajan ina renconuschientscha per ses engaschi e per tegnair la dira. Ses grond giavisch è ch’i dettia ina cuntinuaziun da sia lavur en il sectur da la medischina omeopatica. Anc na sa Erwin Vincenz betg sche quai reussescha.

Sper sia lavur sco veterinari s’engascha el sin palancau naziunal che dapli giuvens veterinaris sa scoleschan era en il sectur da la medischina omeopatica e dat vinavant sia savida sco docent.

Il premi vegn surdà ils 12 da favrer 2016. Sper Erwin Vincenz èn nominads per il premi Bio-Grischun è era il bain puril Las Sorts a Filisur pervi da la producziun da tartuffels da muntogna e las butias dal bain puril pervia da lur sortiment da products biologics.

Artitgels legids il pli savens