Var 40 onns ha Roland Huber lavurà en la branscha da turissem e sa uschia tge che sa midà en quest temp. La tecnologia haja midà la moda e maniera da communitgar cun ils giasts, declera el: «Pli baud stuevan ins propi communitgar dapli cun ils giasts, perquai ch’i na deva betg questa tecnica». Il squitsch saja daventà pli grond entras la concurrenza che saja creschida. Viadis en l’exteriur cun pretschs da dumping n’enconuschevan ins pl baud betg.
Emblidà il giast
Ils ultims onns sajan ins sa fatschentà en il turissem da studis, concepts e da palpiri per chattar vias co vegnir tar dapli daners. Dasperas hajan ins emblidà il giast che na vegnia betg pli sco antruras tut da sez, declera Roland Huber. I saja ussa puspè temps da sa concentrar sin il giast e prender temp per quel.
En il turissem saja ussa da daventar pli fitg interprendider e da sa lamentar pli pauc, manegia Roland Huber. Sch’ins s’orienteschia pli ferm al martgà e porschia ils products che sajan era giavischads dal giast, sche saja la crisa el turissem era da dumagnar. Exempels che quai funcziunia dettia quai avunda.
Dal biro d’infurmaziun tar ils ospitants
Tenor Roland Huber daventan era adina ils ospitants adina pli impurtants quai che pertutga l’infurmaziun. Il giast vegnia pli e pli pauc en il biro d’infurmaziun dal turisem per las infurmaziuns. El giavischia las infurmaziuns da ses ospitant. Per las organisaziuns da turissem veglia quai dir ch’ellas hajan da scolar bain ils ospitants e furnir ad els las infurmaziuns ch’els dovrian per pudair far quest servetsch. Las persunas a la front sajan era las sulettas che possian influenzar positiv il giast e quai sa manifesteschia la finala sin la statistica da pernottaziuns.
Carriera
onn | occupaziun |
1977 | directur da cura a Vulpera |
1984 | manader da fatschenta Allod Ferien Chur |
1986 | directur da cura a Laax |
1988 | marketing pendicularas Crap Sogn Gion, Laax |
1990 | directur uniun da cura Scuol |
1992 | manader da fatschenta Bogn Engiadina Scuol |
1996 | directur Scuol Tourismus SA |
1999 | schef voluntaris CM da skis 2003 San Murezzan |
2001 | directur da cura a.i. citad da Baden |
2002 | directur Adelboden Tourismus |
2002 | manader general dal project Alpenbad Adelboden |
2008 | CO Euro Berna 2008 schef center da voluntaris |
2012 | manader da fatschenta Surselva Turissem SA |
plinavant | president uniun Alpine Wellness / president lieu da bogns grischuns / president Forum 50 plus / manader da fatschenta weltcup.ch / suprastonza Federaziun svizra dal turissem e directurs da turissem / president dal CO Tour de Suisse Laax, Scuol ed Adelboden |