Na, ella na sa legra betg in quest gieu, di Tina Deplazes cun in rir al telefon. Il pli gugent na guardass ella gnanc quest gieu, uschè gnervusa saja ella. Per la giuvna dal chantun Turitg cun ragischs en Surselva ed en Spagna vegni in gieu cun fitg blera tensiun.
I fiss bler pli simpel per mai sche la Spagna e la Svizra na giugassan betg ina cunter l'autra.
Tina Deplazes è adina gia stada in fan da ballape. Cun quai che sias ragischs spagnolas derivan da la Catalugna è ella gia da pitschen ensi grond fan dal FC Barcelona. Sche la Svizra frunta dentant sin la Spagna stat la giuvna da 24 onns avant ina greva decisiun.
Sguard en l’istorgia
La naziunala spagnola ha gudagnà tut quai ch'ins po gudagnar en il ballape: 2008 campiun europeic, 2010 campiun mundial e 2012 anc ina giada campiun europeic. La Spagna ha pia gia pudì festiva gronds success. Auter vesi ora tar la Svizra. Pia ord quai punct da vista:
Cler è che la gnervusitad vegn ad esser fitg gronda tar Tina Deplazes durant il gieu. Actualmain n'è ella betg en Svizra, er betg en Spagna. Ella giauda actualmain vacanzas en il Portugal e vegn a guardar là il gieu.