Siglir tar il cuntegn

Header

cuntegn

Exempel pasternaria Paun pli char: Custs da producziun creschids per almain 15%

La situaziun tendida na saja betg sulet da sentir tar il paun. L’entira confisiera e per exempel era il café sajan vegnids pli chars, di Reto Schmid, pasterner da Sedrun. La raschun saja ch’ils custs da producziun èn s’augmentads ils ultims mais per almain 15%.

La creschientscha dals pretschs saja d’attribuir a las malas racoltas da granezza. Uschia fetschia per exempel la farina ora sin il pretsch d’in paun var 15%. Ils augments per pitschnas butias sajan era da sentir pervia dal pajament cun carta. Qua saja la situaziun uschia, che per pitschens pajaments saja la cumpart che stoppia vegnir dada giu relativ auta. Durant la pandemia saja dapertut stà la devisa da pajar cun carta. Ils custs supplementars sentian las interpresas pitschnas, di Reto Schmid.

audio
Er il paun è vegnì pli char
ord Actualitad dals 16.02.2022.
laschar ir. Durada: 3 minutas 46 Secundas.

Era saja il pretsch d’energia il mument fitg aut ed il pachetadi saja vegnì marcantamain pli char. Sco consequenza ha el auzà il pretsch per var 15% per quasi tut ils products – adequat l'augment dals custs da producziun, di il pasterner da Sedrun.

Communicaziun è impurtanta

Per pudair restar transparent ha Reto Schmid fatg ina publicaziun en la gasetta locala «La Tuatschina». Per el saja impurtant d’esser transparent e communitgar cler, daco ch’ins sto far ils augments da pretsch. Surtut per la clientella da tschep che vegn regularmain en stizun n'ha el per tscherts products betg auzà ils pretschs uschè fitg. El haja vulì dar in signal surtut a famiglias e persunas indigenas.

La fin na saja dentant anc betg cuntanschida. Uschia haja il furnitur da latg gia annunzià ch’ils pretschs vegnian a s’augmentar il proxim temp. Sche quai haja lura in'influenza sin il pretsch da paun, na possia el il mument anc betg dir, accentuescha il pasterner.

Entrada pasternaria Sedrun.
Legenda: La stizun da la pasternaria da Reto Schmid a Sedrun. RTR, Gionduri Maissen

RTR actualitad 07:00

Artitgels legids il pli savens

Scrollar a sanestra Scrollar a dretga