Siglir tar il cuntegn

Header

Exercizi da salvament or da la lavina la not.
Legenda: Salvament or da la lavina - l'exercizi dad urgenza saja stà positiv, dischan ils responsabels da la Pro Lucmagn. ANR
cuntegn

Surselva Exercizi da notg sin il Lucmagn

Sin il pass dal Lucmagn tschiffa ina lavina persunas ed autos: Quai è stà il scenari dad in exercizi da salvament, che la Pro Lucmagn ha organisà ier mesemna saira sin il Lucmagn. Uschia rapportescha l'Agentura da novitads rumantscha ANR.

Il lieu exact da l’exercizi è stà Stgegia. Sin 1’900 meters sur mar e cun temperaturas da -10 grads han exercità las forzas da salvament il cas d’urgenza.

La Colonna d’agid e pumpiers ha gì da salvar persunas ord ina lavina, tranter auter ord in auto tschiffà da quella. Era la polizia chantunala era in acziun tar l’exercizi.

Fazit positiv - direcziun anc da meglierar

L’emprima bilantscha, ch’ils responsabels da la Pro Lucmagn fetschian da l’engaschament tar l’exercizi saja positiva, scriva l’ANR: «Il salvament sco tal ha funcziunà fitg bain e spert», vegn cità Fabrizio Conceprio da la Pro Lucmagn. Quai chi saja dad ameglierar saja la direcziun da l’engaschament sin il plaz.

Il salvament sco tal ha funcziunà fitg bain e spert.
Autur: Fabrizio ConceprioPro Lucmagn

Segund exercizi en il sid dal Lucmagn

Dapi ch’il pass dil Lucmagn è avert er durant l’enviern exista il ceoncept dal salvament per il cas d’urgenza. Ch’els hajan empruvà pliras giadas da coordinar dapi lura in exercizi cun tut ils pertutgads, ha ditg Fabrizio Conceprio a l'ANR.

RR novitads 14:00

Artitgels legids il pli savens

Scrollar a sanestra Scrollar a dretga