Siglir tar il cuntegn
Inhalt

Surselva Experientscha positiva cun uffants dal Löwenberg en scola a Glion

En la chasa per requirents d'asil Löwenberg a Schluein datti in'atgna scola cun instrucziun reducìda per ils uffants dals requirents. L'onn da scola 2013/14 han per l'emprima giada uffants pudì midar en la scola uffiziala da Glion.

Areal da la scola da Glion. Gronds bajetgs cun fatschadas da vaider, davos las qualas ins vesa las stanzas da scola. Davant in champ cun duas maisas da pingpong. El center dal areal sa chatta ina plastica da metal che mussa gronds tschertgels.
Legenda: L'areal da la scola uffiziala da Glion. RTR, C. Albin

En la chasa per requirents d'asil Löwenberg a Schluein vivan famiglias da requirents enfin che l'Uffizi da migraziun ha decidì co vinavant. Quai cuzza mintgatant plirs onns. Ord quest motiv datti in'atgna scola en il center per ils uffants da quests famiglias - ina scola per instruir ils uffants e preparar els sin la midada en ina scola uffiziala. L'onn da scola 2013/14 han per l'emprima giada scolaras e scolars dal Löwenberg pudì entschaiver la scola uffiziala a Glion. Almain ina giada per in temp d'emprova da 3 mais.

Emprova gartegiada

Silvio Dietrich en ses biro. In biro cun preits verdas e gronds maletgs da flurs.
Legenda: Silvio Dietrich, il manader da la scola da Glion. RTR, C. Albin

Il mainascola da la scola uffiziala da Glion, Silvio Dietrich, è stà cuntent cun quest emprim test. Ils 3 scolars che sajan entrads en la scola superiura, eran bain preparads. L’integraziun na saja betg stada in problem. Suenter l'emprim test positiv ha il chantun dà ses consentiment da manar vinavant questa collavuraziun ed ha era surpiglià ils custs per quest scolars. Il davos onn haja el pudì beneventar in ulteriur scolar en la scola superiura. Quest onn n'haja el fin uss anc betg survegni propostas da la scola Löwenberg.