Glion è en mauns da crappa. Tuttas furmas e colurs duain mussar la gronda varietad da la crappa en la regiun. Christian Aubry ha tschertgà, transportà ed exponì passa 200 crappa.
La varietad da crappa en Surselva è propi unica. Da lavurar cun questa crappa ed exponer ella, quai è stà ina fitg bella experientscha.
Ils dus gronds craps èn sin la plazza cumin amez Glion. Ils uschenumnads guardias. Quests crappuns èn vegnids chattads en la Val Cristallina sisum la Surselva. Els paisan otg tonnas e duain attrair l'attenziun.
L'uniun «Schichtwechsel-La Surselva» vul mussar la gronda ritgezza da crappa en la Surselva. Per attrair l'attenziun dal public organisescha l'uniun differentas occurrenzas, guidas tematicas e guidas cun teater en collavuraziun cun il museum.
Las persunas ston s'endisar vid questa crappa amez Glion. Cun sa fatschentar cun la materia crescha l'interess, quai è nossa experientscha.
L'exposiziun cumenza ils 11 da zercladur e dura bunamain quatter onns. Tge che capita alura cun la crappa, n'è anc betg decis.