Il tagliacrappa ed artist Christian Aubry è s’inscuntrà in bel di cun Rino Caduff, l’anteriur president da la citad da Glion.
Ina giada ha l’artist raquintà a mai che la crappa haja decis il di da la stgiradetgna dal sulegl da sa scuntrar a Glion. E nus stoppian uss pussibilitar quai. Cun quai ha l’artist fascinà mai.
Idea da l'exposiziun
Il fundament sin quel che nus passain, pia nossa terra, è naschì en il profund. Il magma e la lava èn atgnamain la basa dal fundament. Quai è la finala la crappa che cumpara e vegn visibla. L’artist Christian Aubry è fascinà da la crappa, cunzunt da la variaziun da crappa. Marmel da Vrin, granit da Punteglias u simplamain crappa da la val da Siat. Cun quella materia lavura l’artist gia dapi onns. Entras l’uniun «Schichtwechsel – La Surselva» ch’è vegnida fundada a posta po Christian Aubry ussa realisar quella gronda exposiziun.
Tut en preparaziun
Actualmain vegn l'exposiziun preparada. La proxima stad avra lura l'exposiziun cun ina festa d'avertura ils 11 e 12 da zercladur. Tut en tut vegn l’exposiziun a cuzzar trais onns e mez. Ella vegn accumpagnada dal Museum regiunal Surselva, che ha sias localitads en la citad veglia da Glion. Ils custs da quella exposiziun cun tut las activitads èn calculads cun in milliun francs. Als custs sa participeschan l'uniun purtadra, las vischnancas sursilvanas sco er il chantun.