Siglir tar il cuntegn
Inhalt

Surselva Fabio Wetzel: Lavurà vid la pli gronda e pli lunga pendiculara

Sco montader da pendicularas ha Fabio Wetzel da Mustér lavurà vid dus projects da pendicularas che rumpan records.

Sco collavuratur da Garaventa è el stà involvì tar omadus projects. Mintga project saja auter e tar talas dimensiuns saja quai anc ina pli gronda sfida da realisar, declera il giuven da 26 onns. Il squitsch da temp saja enorm. I vegnia lavurà 12 uras per di e 7 dis per emna. Be mintga mais e mez dettia quai tut tenor intgins dis liber.

Era il lavurar cun ils indigens na saja betg adina uschè simpel. Sco Fabio Wetzel di sajan quels pajads fitg mal ed uschia saja era la motivaziun magari pitschna. I saja adina da guardar ch’els hajan lavur. Cun lavurar tantas uras ed uschè intensivamain in cun l’auter daventian ins dentant collegas che sa gidian lura era in cun l’auter. Tschertins dals lavurers sajan uschè paupers ch’els n’hajan gnanc chalzers u resti endretg. «Lura devas magari in per chalzers u insatge vestgadira. Persuenter faschevan els lura era per tai diversas chaussas» declera Fabio Wetzel.

Da chasa en la Tailanda

Omaduas pendicularas èn vegnidas a fin quest onn ed en ussa avertas. Fabio Wetzel ha dà giu la plazza tar Garaventa e fa ussa in pau vacanzas. El è sa chasà cun sia amia da la Tailanda a Kathu sin l’insla Phuket. Ses da chasa saja ussa la Tailanda. L’idea è da metter en pè ina fatschenta en il sectur d’immobiglias e fitgar pè en la Tailanda. Dapi ch’el ha fatg avant 7 onns l’emprima giada vacanzas en la Tailanda è el fascinà dal pajais e sia populaziun.

La pendiculara da Halong

La pendiculara sur il golf da Halong pussibilitescha als milliuns da turists che visitan quest lieu en il nord dal Vietnam da vegnir dad ina vart dal golf sin l’autra, nua ch’igl è vegnì erigì in parc da divertiment cun ina roda gigantica nua ch’ils turists pon era guardar sur il golf da Halong. La pendiculara è vegnida concepida e bajegiada aifer 19 mais.

Datas tecnicas

Lieu Golf da Halong, Vietnam
Lunghezza
2,165 m
Differenza d’autezza
88,5 m
Staziuns
2
Pilasters
2 (123,45 m e 188,88 m)
Capacitad
2'000 persunas per ura
Capacitad per cabina 230 persunas
Sveltezza
10 m/s (36 km/h)
Pendiculara che va sin il Fansipan.
Legenda: Pendiculara che va sin il Fansipan. mad

La pendiculara sin il Fansipan

Il Fansipan è cunzunt per ils indigens ina destinaziun fitg tschertgada. Arrivar sin il pli aut culm dal Vietnam (3143 m. s. m.) pudeva cuzzar tras la tschungla plirs dis. Ussa vegn ins en 15 minutas prest sin il piz – il tetg da l’Indochina.

Datas tecnicas

LieuSapa sin il culm Fansipan, Vietnam
Lunghezza6,326 m
Differenza d'autezza1410 m
Staziuns2
Pilasters4
Capacitad2'000 persunas per ura
Capacitad per cabina30 persunas
Sveltezza8 m/s (28,8 km/h)
Temp da viadi14,8 min

RR actualitad 08:00