La raschun persuenter èn las lavurs da restauraziun vid ils clutgers. Ubain pli exact, ils lavurers che lavuran enturn il clutger. Sco il stuccatur Thomas Krüger di, saja quai extrem dad aut sch’ins saja dasperas vid lavurar. El haja quintà ch’i saja dad aut. Ma che quai saja uschè extrem, n’avessi el betg spetgà. Lavurar cun protecturs d’ureglias l’entir di na saja betg empernaivel, ed ins n’audia n’era betg sch’i capitia insatge.
Ils paders èn disads e dovran il tuchiez per ch'els n'emblidian betg da sa radunar per far oraziun.
Perquai vegnan ils zains tschentads ora durant l’avantmezdi ed il suentermezdi, declera il caluster frater Fridolin. Els pudessan era tschentar ora dal tut ils zains. Dentant ils paders sajan disads e dovrian il tuchiez per ch'els n'emblidian betg da sa radunar per far oraziun, di frater Fridolin. Uschia ha el in per giadas a di dad ir sin clutger per tschentar en ed ora il tuchiez. Sch’il convent ha messa ed i vegn tutgà durant il di, lura vegnan ils lavurers infurmads. Sco Thomas Krüger di, tschertgian els lura lavurs che sajan pli da lunsch davent dals zains. Frater Fridolin quinta che quai giaja anc dus mais. Lura sajan las lavurs vid ils clutgers a fin ed i vegnia puspè dà las uras sco usità.
RR actualitad 07:00