La fascinaziun per autos vegls ha Sandro Deplazes gia adina gì. Uschia ha el l’emprim cumprà in auto vegl, in «Pontiac», dal pasterner da ses vitg patern da Rabius. Ma lez auto baveva bler memia bler benzin, uschia che quai n’è betg stà in auto per lungs viadis, di Sandro Deplazes, ch’ha fatg in'emprendissadi da mecanist. Alura ha el vis ses auto actual en in inserat ed ha cumprà el. Ma gia l’emprim viadi encunter chasa n’ha il «MGA» da l'onn 1956 betg dumagnà, uschia ch’el è vegnì duas emnas suenter sin in char annex fin a Rabius. Sin quai ha el prendì dapart tut, il motor, ils girs e mess en ina nova part sut da l’auto ord da lain sco l’original e dapi lura giria l’auto sco in anghel, di Deplazes cun in surrir.
Turas mo en dus
L’auto è in cabrio ed els fetschian sulet viadis en dus, di Natalia Deplazes-Albin. Autos hajan gia adina fascinà ella, surtut ils autos vegls. Ma ella sesia pli gugent dasper en l’auto e giaudia il viadi. En il mender cas possia ella manischar l’auto, ma quai saja quasi lavur corporala, la roda da manar saja greva ed ils girs e frains na sajan betg sco tar autos novs, quels dovrian forza, uschia Natalia Deplazes. Ma ella possia manischar sezza l’auto, surtut sche quai avessi da capitar insatge sin viadi.
Mintg’onn en il Tirol dal Sid
Gia dapi plirs onns van Natalia e Sandro Deplazes communablamain al «Südtirol Classic Schenna Rallye». Quai saja in eveniment nua ch’ins po s’inscuntrar mintg’onn cun amis d'autos vegls. La cursa saja organisada fitg bain, e la regiun e l’entir flair fascineschia fitg, di Natalia Deplazes. La cursa n’è betg dad ir svelt al lieu, i dettia posts ch'èn da cuntanscher en in temp dà avant. Tgi che saja il pli datiers a quest temp survegnia ils blers puncts, declera Sandro Deplazes la concurrenza. En pliras ediziuns han els era gia gì success e sa legran mintg’onn da sa participar. Quai saja lura era gist il pli lung viadi cun lur oldtimer, uschia fetschian els annualmain circa 3’000 kilometers ad onn, e quai sulet da bell’aura. Plievgia na verteschia l’oldtimer cabriolet betg propi, alura stoppian els adina esser dadens e schubregiar l’aua, di Natalia Deplazes cun in rir. Perquai prefereschian els il sulegl per far turas spontanas.