«Nus na pudain betg simplamain sa lamentar, nus stuain esser activ e porscher insatge» e perquai ch’el è adina puspè vegnì dumandà sch’ins possia era bajegiar ina chasa per 5 fin 600’000 francs è Patrick Rothmund vegnì sin l’idea da projectar in model da chasa sco quai che differentas firmas en la bassa porschan. Londeror hai dà la “Casa Sursilvana”.
Buna qualitad per in fair pretsch
La “Casa Sursilvana” è ina chasa da lain cun 2 auzadas ch’è sin pitgas. Quai dat la pussaivladad dad avair in'entrada en chasa cuverta, ed avair plaz per metter sut tetg l’auto ubain auter urden, senza ch’i custa bler. Per Patrick Rothmund èsi impurtant che fatschentas indigenas fabritgan la chasa. Perquai ha el tschertgà fatschentas ord las differentas spartas sco partenari, quai che permettia era ina buna qualitad da la lavur. La construcziun d’ina “Casa Sursilvana” custa sco quai ch’ella è projectada 530’000 francs. Sco quai che Patrick Rothmund ha ditg, possian ins schizunt anc resguardar tscherts giavischs individuals da la clientella en quest pretsch. Patrick Rothmund è persvas ch’i dat interessents per questas chasas.