Siglir tar il cuntegn

Header

Navigaziun

cuntegn

Festa cun gieus e divertiment Emprima festa dal vitg a Trun

La cumissiun da cultura da la vischnanca da Trun ha ponderà tge che manca a Trun ed ha organisà ina festa dal vitg. Surtut la stad saja bel da pudair esser en il liber ed i na marschia betg bler la stad a Trun e perquai hajan ins decis dad organisar ina festa per l’entir vitg, di Flurina Bundi-Steiner.

Idea naschida a Zignau

Sco la promotura da la prima festa dal vitg a Trun di, saja ella creschida si a Zignau nua ch’i devi mintga dus onns ina festa dal vischinadi e quai haja plaschì. Uss saja temp d'organisar ina sumeglianta festa cun gieus e divertiment per l’entir vitg da Trun, di Flurina Bundi-Steiner. E per che bleras persunas sa participeschian als gieus dal suentermezdi datti era da gudagnar premis. Quai saja probabel necessari per animar era creschids da giugar. Purschids vegnan gieus sco

  • emplunar harassa
  • sajettar cuppas
  • sajettar cun buis d’aria
  • pestgar andinas
  • dar botscha ....ed anc bler auter

Agid dovri

Per che tuts hajan plaz, ha il comité d’organisaziun installà ina tenda per 600 persunas. Il club da ballape da Trun/Rabius sco era la musica da tschaiver «Las Lieurs da Trun» sa gidan cun l’infrastructura e cun la gastronomia, di Flurina Bundi-Steiner. E lura dettia quai era sustegn da pliras interpresas localas ed era da la vischnanca.

Emblidar ils quitads

Il principal per il comité d’organisaziun saja che la festa saja per pitschen e grond. E sco Flurina Bundi-Steiner di, saja era per ils creschids mintgatant impurtant da pudair emblidar la lavur ed ils quitads e simplamain giudair e sa divertir.

RR actualitad 07:00