Il chor maschadà da Surrein ha organisà per la 5avla giada in martgà d’advent. Mintg’onn na datti dentant betg in tal, perquai che la lavur che vegn prestada da las commembras e dals commembers è immensa. Uschia èn quest onn vegnidas prestadas circa 500 uras da lavur per vegnir da crear tut ils cranzs d’advent ed auters products.
Fitg bleras visitadras e visitaders
La halla da gimnastica a Surrein è stada plaina, uschia che betg tuts han chattà in plaz per mangiar ina schuppa da giutta. Ed era quels ch'han chattà in plaz n'han betg tuts survegnì ina schuppa. Sco il president dal chor Beat Candinas ha ditg, era la schuppa finida da mesa las duas ed il cuschinier ha stuì ir a far ina segunda chazzetta. Ma per ils organisaturs è la gronda fulla da visitaders stada ina gronda satisfacziun per tut la lavur impundida sco era ch’ils pitschens regals zambregiads han chattà cumpraders.
Sa tegnair ensemen
La fracziun da Surrein ha ina fitg viva convivenza e quai sa mussa surtut tar tals eveniments, di Beat Candinas ed ì para sco sche pitschen e grond èn quella dumengia en halla a Surrein. Ma betg sulet da Surrein e Sumvitg, era dad autras vischnancas e schizunt da la Lumnezia han ins chattà la via a Surrein.
RTR actualitad 07:30