La resposta dals visitaders e da las visitadras sin la dumonda, pertge ch'els sajan qua, è simpla: Perquai ch'igl è bel dad ir en l'aua frestga, perquai ch'ins po far patgific en la sumbriva d'ina planta u passentar temp cun ils amis e las amias. Intgins uffants e giuvenils èn era qua perquai ch'els na san uschiglio betg tge far a chasa.
Pervia dal traffic
Daco ch'intginas visitadras e visitadras èn era sa decidì da passentar la fin d'emna en il bogn avert a Glion è il traffic e las colonnas d'autos vers il sid:
Qua è pli datiers ed è in bel plaz uschia ch'ins na sto betg star duas uras en colonna.
Ma là nua ch'i vegn giudì stoi era vegnir lavurà. Per exempel a la cassa u al kiosc nua ch'ils dus giuvens Yann Lofthouse e Julian Zurfluh lavuran quest di.
Jau sun bler sonda e dumengia e mesemna suentermezdi qua. Igl è bain lavur ma ins è bler dador e na sto era betg lavurar l'entir temp.
Quest di han els pudì notar passa 440 entradas. Quai saja bler, damai ch'i na saja anc betg stagiun auta, di Julian Zurfluh. E fin la fin dal di èn segir anc intginas vegnidas vitiers, pertge il bogn avert trai. Saja quai per nudar rundas, star per lung sin il sientamauns u per mangiar ina purziun pommes frites u in bun glatsch.