Siglir tar il cuntegn

Header

Yannick Pelletier e Lena Georgescu en la sala dal turnier
Legenda: Yannick Pelletier e Lena Georgescu en la sala dal turnier RTR, Hubert Giger
cuntegn

Flem Corona e campiunadi svizzer da schah

Dals 8 fin ils 16 da fanadur sa mesira l’elita da schah en Svizra a Flem, e quai gia la terza giada suenter 2012 e 2016. Pervia da corona datti dentant mo 4 turniers per umens, dunnas, juniors e seniors. La federaziun svizra n'ha betg pudì organisar la categoria cun ils amaturs.

audio
Flem: Campiunadi da schah sut l'ensaina da corona
03:04 min, Actualitad dals 10.07.2021.
laschar ir. Durada: 03:04 minutas.

Nagut remplazza la pratica

Enstagl da passa 300 giugaders da schah èn mo 35 a Flem. En la categoria dals umens d’elita è Yannick Pelletier (oriund da Biel, abitescha a Luxemburg) il favurit cun 2581 puncts d’ELO. El manegia dentant, ch’el na sappia betg nua ch’el stettia, perquai ch’el haja dà l’ultima partida en in turnier il schaner 2020. Ma per cletg haja el pudì trenar cun ses scolars e studegiar teoria ed ideas. Nagut remplazzia dentant la pratica da giugar.

Sa preparar per ils campiunadis europeics

En la categoria dals umens cun 9 rundas dattan era duas dunnas: Yelena Sedina (Chiasso, 2291 ELO) e Ghazal Hakimifard (Turitg, 2265 ELO). Yelena Sedina di che quai saja in'ulteriura experientscha per ella, suenter ch’ella n'haja betg pudì dar turniers pervia da corona. Impurtant per ella è, ch’ella possia sa preparar per ils campiunadis europeics.

Tschertas aspectativas

Lena Georgescu (Berna, 2257) è la favurita en il turnier da dunnas cun 9 rundas. I saja l’emprima giada ch’ella saja en questa posiziun. Ins haja tschertas aspectativas, ma perquai ch’ins n'haja betg giugà pli uschè ditg, na saja quai betg cler, tge situaziun da partenza ch’ins haja.

André Gisler, directur da turissem da Flem-Laax-Falera (sen) encunter André Vögtlin, president da la federaziun svizra da schah
Legenda: André Gisler, directur da turissem da Flem-Laax-Falera (sen) encunter André Vögtlin, president da la federaziun svizra da schah RTR, Hubert Giger

Schah online

Pervia da corona è la situaziun era stada difficila per ils organisaturs. Sco il president da la Federaziun svizra da schah André Vögtlin di, hajan els stuì giuditgar mintga turnier e spetgar, tge ch’il Cussegl federal decida. Il schah online haja salvà els, cura ch’els na pudevan betg far insatge. Corona ha dentant impedì 2020 in campiunadi svizzer da schah.

La conferenza da medias
Legenda: La conferenza da medias RTR, Hubert Giger

Ord l'archiv

Il 1983 aveva il Telesguard rapportà dad in turnier da schah a Mustér.

video
Schach-Turnier
Or da Telesguard dals 21.05.1983.
laschar ir

RTR actualitad 08:00

Artitgels legids il pli savens

Scrollar a sanestra Scrollar a dretga