Flem è sin il cunfin dal territori rumantsch ed il rumantsch ha da cumbatter per il surviver. La «Cuminonza romontscha Flem» emprova da mantegnair il linguatg cun organisar occurrenzas. A la radunanza generala ha la suprastanza preschentà il program per l'onn current.
Ils giuven e las giuvnas mancan
La cuminanza rumantscha da Flem ha en il mument 107 commembers e commembras. Blers da quels sun en la vegliadetgna da pensiun. La cuminanza sa sprova da motivar era la giuventetgna da s’engaschar per il rumantsch a Flem.
Vast program
L'uniun organisescha ensemen cun la Lia Rumantscha ils Cafés rumantschs sco era las guidas rumantschas tras Flem. Plinavant datti sairas da chant avert e s’entupadas ed excursiuns per la cuminanza. Per il november è planisà ina commemoraziun da l'enconuschent scriptur e poet da Fidaz, Gian Fontana ch’è naschì avant 125 onns.
Rumantsch en scola
Dapi il davos onn da scola porscha la vischnanca da Flem ad uffants da geniturs rumantschs la pussaivladad da visitar uras rumantschas supplementaras. Ina purschida ch’è vegnida introducida era cun l’iniziativa da la cuminanza rumantscha.