A Flem hai brischà la notg passada en ina cuschina en ina chasa da pliras famiglias. Las persunas che sa chattavan en il bajetg hajan infurmà las abitantas ed abitants ed hajan lura pudì bandunar sezzas la chasa. Quai scriva la Polizia chantunala en ina communicaziun. Ils pumpiers da Flem hajan lura spert gì sut controlla il fieu. Pervi d'ina pussaivla tissientada da fim ha l'ambulanza transportà in um da 51 onns en l'ospital.
Tenor emprimas enconuschientschas haja ina maschina da lavar giu brischà. Il donn da material saja tar pli che 10'000 francs.