Sco la famiglia ha dà enconuschent, è Hanspeter Meiler mort dumengia passada en la vegliadetgna da 77 onns. En la regiun è el stà enconuschent sco «il pec da Flem». Sia pasternaria Crest a la Via Nova ha el fundà 1972. Suenter 37 onns han el e sia consorta Irma pudì surdar quella 2009 al figl Ursin.
Blers onns è Hanspeter Meiler s'engaschà en l'Uniun grischuna dals pasterners e conditers. El era in losch vischin e burgais da Flem ch'è s'engaschà en e per las uniuns. Sco musicant è el stà fidaivel durant decennis a la Societad da musica da Flem. Per «sia» musica ha el fatg part da comités d'organisaziun da festas chantunalas e districtualas, da giubileums ed occurrenzas pitschnas e grondas.
Hanspeter Meiler è stà ina pitga dal rumantsch a Flem. Blers onns ha el fatg part da la suprastanza da la Renania. Questa attaschadadad ha el importà en sia fatschenta. Consequentamain ha el resguardà sia lingua materna per nums e descripziuns da products e spezialitads. La charezza per il rumantsch ha accumpagnà el enfin il davos. Ensemen cun singuls cumbattants è Hanspeter Meiler s'engaschà da revitalisar la Cuminanza rumantscha da Flem ch'el ha presidià enfin a sia mort.
Or da l'archiv:
