«Gea, i constat, a Flem, ed insumma en tut las regiuns da las Alps, èn ils hotels suttamess actualmain a midadas cuntinuadas», conferma Christoph Schmidt. Il president communal da Flem è sin il current en connex cun l'hotellaria da Flem. Ensemen cun sia consorta Sandra maina el, en quarta generaziun, il hotel Schweizerhof. Quella chasa amez Flem-Casa d'Uaul è in monolit ferm e stataivel en la cuntrada da chasas d'albiert. Divers hotels èn numnadamain confruntads cun reglar la successiun, s'orientar da nov e tschertgar la via en il futur. Il hotel Albana han ins scarpà giu dacurt, per il Miraval è in project da bajegiar en vista. E tar trais auters privats, il hotel Cresta, il hotel Vorab ed il hotel Bellevue, èn midadas da generaziun en vista. Sch'i na gartegias betg da tegnair en famiglia il manaschi, ston ils possessurs chattar alternativas adattadas.
Zona da hotel a Flem-Casa d'Uaul
Avant 25 onns ha l'hotellaria en las muntognas cumenzà a sa deditgar – paradoxamain – a la parahotellaria. Ils hoteliers privats da Flem pon ins cumpareglia cun purs u auters interprendiders. «Mintga famiglia da purs vegn insacura al term ch'igl è da surdar il manaschi e reglar la successiun», manegia Christoph Schmidt. Quai ch'il pur na pudeva betg far cun sia stalla, ha il hotelier pudì far cun ses hotel: bajegiar abitaziuns, vender quellas e viver da la rendita. Almain avant ch'il pievel svizzer ha acceptà 2012 l'iniziativa da las secundas abitaziuns. Suenter il concurs dal Parkhotel Waldhaus e la vendita da quel ad ina societad americana ha la vischnanca prendì mesiras per impedir che anc dapli letgs da hotel giajan a perder e per garantir il spazi per il svilup. A Flem-Casa d'Uaul ha la planisaziun locala definì ina zona da hotel. En quella è l'intent da dar alloschi a giasts garantì ed in diever alternativ sco abitaziuns primaras betg prevesì.
Il hotel Schweizerhof da la famiglia Schmidt è inclus en quella zona nova. Uschia na pudess quella betg simplamain serrar il hotel e far ordlonder residenzas d'abitaziuns primaras. Medemamain è la famiglia dal hotel Cresta pertutgada da la mesira encunter la mort da hotels. Trais auters a Flem Vitg pon perencunter trer a niz quest instrument: Il hotel Albana han ins spazzà dacurt. El vegn reconstruì cun ina part abitaziuns administradas. Era ils hotels privats Vorab e Bellevue èn al spartavias ed ils possessurs betg suttamess ad ina zona da hotel. Els pon duvrar ils edifizis tant sco hotel sco era per abitaziuns primaras novas.
Chadainas, Intersoc e Michel Reybier
Ina chasa da gronda tradiziun ch'e stada confruntada ils davos onns cun midadas è l'hotel Adula. El è en la zona da hotel e sto mantegnair la purschida da hotel. Sco quai che Christoph Schmidt remartga en discurs cun la FMR, ha el gronda fiduzia en il futur da quest manaschi. El numna era il motiv: «Las premissas dals possessurs èn bunas. Il hotel Adula fa part da la gruppa Michel Reybier Hospitality.» Quella posseda anc auters hotels da luxus, il Bellevue Palace a Berna, il Palace a Lucerna, l'Eden au Lac a Turitg ed il Victoria-Jungfrau Grand Hotel ad Interlaken.
Era in auter hotel da tradiziun a Flem-Casa d'Uaul, il Surselva, ha gì ils davos decennis intginas midadas. Oz appartegn el a la chadaina Intersoc. Igl è la cassa da malsauns belga che porscha a ses commembers vacanzas en las Alps svizras. Enstagl dad ir a Mustér en l'hotel Acla da Fontauna pon ils commembers giudair oz a Flem la purschida da l'hotel Surselva.
En la proxima vischinanza da quel è l'hotel Schweizerhof che la famiglia Schmidt maina en quarta generaziun dapi il 1905. Fa Christoph Schmidt betg quitads pervia dal futur? Sin il pli tard en 15 onns è era sia famiglia confruntada cun la dumonda da la successiun. Co vesa el la cuntinuitad da quest monolit turistic ferm e stataivel? «Flem porscha excellentas cundiziuns per in turissem saun da stad e d'enviern. Perquei guardain nus fitg optimisticamain en il futur. Nus sa spruvain en il mintgadi d'intermediar als vegnents suenter la relaziun, il connex ed ils aspects positivs da la hotellaria», respunda el. El e sia consorta èn pertscherts che betg in dals descendents stoppia esser sfurzà da surpigliar l'hotel en la tschintgavla generaziun. «Per pudair lavurar vinavant en quella clamada, sto l'affecziun e l'amur per quest pensum esser sincera e natirala.»