Repetidamain ha il suveran da Flem renvià projects che la suprastanza communala leva realisar. La davosa giada avant dus onns cura ch’i gieva per remplazzar l’ustaria al lai la Cauma.
«Avegnir Flem / Zukunft Flims»
Sut quest titel ha la suprastanza communala instradà in project per involver pli baud la populaziun en la furmaziun da l'opiniun. Sin fundament da la planisaziun legislativa èn vegnidas formuladas finamiras centralas. Tar maisas radundas ha la populaziun gì la pussaivladad da contribuir al svilup da las finamiras.
A chaschun da l'emprim «Dialog avegnir Flem» infurmeschan las autoritads sur da las constataziuns ch’èn sa cristallisadas ord las maisas radundas. Plinavant vegn infurmà co il svilup en la vischnanca da Flem duai sa sviluppar tar temas sco turissem, ambient, abitar per indigens u il svilup al Prau la Selva e tar l’arena da la Chasa d’Uaul.
Finamira da la meglra communicaziun cun la populaziun è ch’ils projects passan en avegnir era las votaziuns finalas a l’urna e che las fatschentas na dovran betg pliras emprovas per vegnir realisadas