Siglir tar il cuntegn

Header

Navigaziun

Flem, Laax, Falera
Legenda: Flem, Laax, Falera RTR, Linus Livers
cuntegn

Flem, Laax e Falera Tribunal federal conferma las taxas da giasts

Consorts che possedan ina abitaziun a Falera ed a Flem ed in um da Laax avevan fatg recurs encunter la taxa da giasts. Suenter las vischnancas e la dretgira administrativa dal Grischun ha uss era la dretgira federala (cun la sentenzia dals 15.04.2019) refusà ils recurs.

Ils possessurs d'abitaziuns secundaras avevan fatg recurs cunter la taxa da giasts cun ils motivs:

  • che la taxa cuntrafetschia a la constituziun communala
  • che la vischnanca dovria questa taxa per alimentar las finanzas communalas
  • che la pauschala annuala da la taxa da giasts saja memia auta

Taxa per finanziar l'infrastructura turistica

Il Tribunal federal ha argumentà en tut ils trais cas tuttina: Las vischnancas mussian detagliadamain, tge entradas da la taxa da giasts e da turissem ch'ellas hajan gì ils onns 2014, 2015 e 2016 e co questa taxa saja vegnida duvrada, numnadamain per finanziar il manaschi e l’infrastructura turistica.

Gia la Dretgira administrativa dal Grischun aveva refusà il recurs dals possessurs d'abitaziuns secundaras ils 25 d’october 2017; ed avant avevan gia las vischnancas da Flem, Laax e Falera refusà quel.

Tschertgar dialog

Il president da la cuminanza d'interess dals possessurs dad abitaziuns secundaras Reto Fehr è trumpà. Els hajan sperà dad almain survegnir raschun en tscherts puncts. Il positiv da la procedura giuridica saja che las vischnancas preschentian las entradas da la taxa da giasts. En l'avegnir spera el ch'ins discuteschia puspè ensemen.

RR novitads 12:00+