Siglir tar il cuntegn

Header

Ina vatga mamma cun vadels.
Legenda: La vatga-mamma protegia ses vadels. Keystone
cuntegn

Surselva Flem, Laax e Falera vulan proteger meglier ils viandants

Sin las alps duain tut las sendas da viandar e da velo vegnir separadas cun saivs da vatgas-mamma.

La fin fanadur da l’onn passà è ina viandanta da 77 onns vegnida attatgada el territori da l'alp Nagens sur Laax d'ina vatga-mamma ed morta curt suenter l'attatga da las blessuras. Il cas n’è anc betg serrà, las 3 vischnancas da Flem, Laax e Falera han dentant tuttina decidì da prender mesiras per ch'uschia in accident na possia betg pli schabegiar.

audio
Bunura: Mesiras per evitar accidents cun vatgas-mamma cun Marc Woodtli
03:41 min, Actualitad dals 27.04.2016.
laschar ir. Durada: 03:41 minutas.

Duas novas mesiras

Tenor il maina project da l'Arena Alva Marc Woodtli, el coordinescha il project tranter l'organisaziun turistica e las vischnancas Flem, Laax e Falera, vegnan realisadas duas novas mesiras. Per ina vegnan ils areals d’alp cun vatgas-mamma ed era tals cun chauns da protecziun da muntaneras inditgads sin las chartas da viandar. Plinavant vegnan era descrits tips, co sa cuntegnair envers vatgas-mamma e chauns da protecziun da muntaneras. Sco segunda mesira vegnan las sendas da viandar e da velo separadas cun saivs da las vatgas-mamma. In contact direct da viandants u velocipedists cun vatgas-mamma na duai betg pli esser pussaivels.

La nova charta da viandar cun las zonas da vatga-mamma.
Legenda: La nova charta da viandar cun las zonas da vatga-mamma. Flims Laax Falera Management SA

Custs anc betg enconuschents

Quant che quellas mesiras custan è dentant anc betg cler. L'emprim sto tenor Marc Woodtli vegnir definì nua exact ch'i dovria saivs e tge sort saivs che saja adattada. Sin basa da quellas infurmaziuns possian lura vegnir calculads ils custs totals. Ils custs vegnan surpigliads da las vischnancas Flem, Laax e Falera cun l’agid da l’organisaziun turistica. Las vischnancas han era l’incumbensa d’installar e da mantegnair las saivs. Davent da circa mez favrer duain tut las lavurs esser finidas, en mintga cas avant che las alps vegnan chargiadas.

Artitgels legids il pli savens

Scrollar a sanestra Scrollar a dretga