Siglir tar il cuntegn

Header

cuntegn

Surselva Flem: Nagins problems cun ils parcadis provisorics

La vischnanca da Flem e las pendicularas Arena Alva han pretendì dal patrun da construcziun dal Stenna Center, ch'i dettia durant l'entir temp da construcziun almain 500 parcadis a Flem. E quai era durant il temp che la veglia chasa da parcar n'è betg stada en funcziun.

Per realisar il project Stenna Center amez Flem è la veglia chasa da parcar en la val Stenna vegnida spazzada l'avrigl 2017. Las emprimas trais auzadas da la nova chasa da parcar han pudì vegnir avertas mez december 2017. Durant il temp senza chasa da parcar ha il patrun da construcziun stuì garantir almain 500 plazzas da parcar a Flem, ina pretensiun da la vischnanca e da las pendicularas Arena Alva. Perquai èn vegnids creads parcadis provisorics en vischnanca.

audio
Stenna Center a Flem - tut ha funcziunà bain cun ils parcadis
ord Actualitad dals 12.02.2018.
laschar ir. Durada: 2 minutas 48 Secundas.

Naginas reclamaziuns da giasts

Tenor il chanzlist da Flem, Martin Kuratle, haja la schliaziun cun parcadis provisorics funcziunà bain. Reclamaziuns da giasts n'haja betg dà. Quai conferma era il responsabel per l'infrastructura da l'Arena Alva, Martin Hug. El è era cuntent, che las emprimas trais auzadas da la nova chasa da parcar en il Stenna Center sajan vegnidas avertas al public mez december, gist sin l'entschatta da la stagiun d'enviern 2017/18.

Il maina project Peter Heuscher da la Senn Resources SA.
Legenda: Il maina project Peter Heuscher da la Senn Resources SA. RTR, C. Albin

Parcadis provisorics anc betg schliads

Sco il maina project dal Stenna Center, Peter Heuscher, ha confermà a RTR, vegnan ils parcadis provisorics anc betg schliads, era sch'i dettia puspè 500 plazzas en la nova chasa da parcar. Cura che quai duai succeder stoppia el anc discutar cun la vischnanca. Il patrun da construcziun aveva paja l'endrizzament dals parcadis provisorics, la vischnanca da Flem ha incassà la taxa da parcar ed è stada responsabla per il mantegniment dals parcadis.

RR actualitad 08:00

Artitgels legids il pli savens