Gia ils onns 1997 e 2003 avevan las suprastanzas da Flem proponì da remplazzar l'ustaria al Lag la Cauma. Omaduas giadas aveva la populaziun renvià ils projects. Ussa pudessi gartegiar da remplazzar il bajetg vegl a l'ur dal lai.
Concurrenza d'architectura
Per chattar ina soluziun ideala ha la suprastanza communala envidà 6 biros d'architectura ad ina concurrenza. Gudagnà ha l'architecta Corinna Menn che ha ses biro a Cuira. Cun sia proposta dat l'architecta dapli spazi a la riva dal lai e prenda uschia resguard sin il lieu da muntada naziunala.
Furma da cubus
La nova ustaria vegn bajegiada en furma da cubus sin trais plauns. El plaunterren è previs in'ustaria da servir sasez per ils giasts che fan bogn en il lai. Sin il segund plaun datti localitads da persunal e da magasin ed el terz plaun ch'è sin il livel da la senda da viandar datti in'ustaria cun terrassa per ils viandants.
Suveran decida anc quest onn
Sche tut va tenor plan decida la populaziun da Flem anc quest onn davart il credit da bajegiar da 6,5 milliuns francs. Las lavurs da cumenzament èn planisadas l'avust 2020. Il zercladur 2021 duaja la nova ustaria lura vegnir averta.
RR novitads 06:00