Avant in onn e mez ha la Paval Holding cumprà l'hotel Waldhaus a Flem. Ils novs possessurs vulevan oriund avrir l'hotel da luxus gia quest atun.
Las renovaziuns necessarias dovran dapli temp che calculà. Quai han ils possessurs communitgà sin lur pagina d'internet.
Sanaziuns superfizialas
L'hotel era vegnì sanà la davosa giada l'onn 2016 dals anteriurs possessurs americans. Lez avevan dentant sanà ils bogns e las duschas en las chombras mo opticamain. Las installaziuns en las paraids n'eran betg vegnidas sanadas e procuran ussa per problems.
La nova possessura, Paval Holding, ha ussa elavurà in concept da sanaziun. Quel ha mussà chi dovra in pli lung temp per las sanaziuns.
Nagins quitads a Flem
Sco il president communal, Christoph Schmidt, ha ditg envers RTR saja il plan dals investurs chapaivel e realistic. Impurtant saja che l'hotel avri puspè las portas. Il Waldhaus saja da muntada regiunala per la hotellaria cun sias 140 chombras. Era economicamain saja il manaschi impurtant cun sias var 100 plazzas da lavur