Co far il pass en il futur? Per respunder questa dumonda ha la suprastanza communala da la vischnanca da Flem elavurà ina strategia. Il principi fundamental da quella è tenor communicaziun: Ina strategia ecologica e persistenta per l'entira vischnanca en tut ils champs – economic, ecologic e social.
In tschuat mesiras e projects èn vegnids evaluads
La strategia «Flem Futur» cuntegna differentas mesiras ord differentas spartas – davent da mesiras per il turissem e l'economia, la furmaziun ed innovaziun, fin la cuntrada, l'ambient, energia, mobilitad e societad.
Tranter quellas mesiras tutgan per exempel projects per il Lag la Cauma ni l'arena tectonica Sardona. Dentant er ina charta per la protecziun da la natira a Flem. Plinavant duai «Prau la Selva »vegnir reposiziunà sco center per il sport e temp liber en la destinaziun.
Populaziun duai far part da process politics
In'ulteriur punct prevesa er l'integraziun da la populaziun en ils process politics ed ils projects da la vischnanca. Tenor communicaziun duai cunzunt la giuventetgna vegnir pli fitg a pled. Plinavant duain tut quels process esser pli transparents.
Uschia duain tut ils burgais da Flem pudair prender posiziun areguard ils differents projects e las differentas mesiras. La vischnanca saja dentant er averta per atgnas propostas.
