Ustaria da muntogna Foppa
Suenter in incendi devastant l'october 2024 – ch'ha destruì cumplettamain l'ustaria da muntogna Foppa – planisescha la vischnanca da Flem la reconstrucziun ed ha perquai dumandà in credit supplementar da 1,125 milliuns francs. Quest credit ha la populaziun da Flem uss approvà cleramain cun 90% da las vuschs. Bun 900 persunas èn sa participadas a la votaziun – quai èn prest 50% dals votants e las votantas da Flem.
Foppa è en ils cors dals da Flem, ed ussa ch'i dat nagina ustaria suenter il brischament vain nus quintà cun ina gronda acceptanza – era perquai ch'i dat nagina alternativa.
Plans da sanaziun e catastrofa d'incendi
Oriundamain è l'ustaria da muntogna Foppa vegnida cumprada il 2022 e dueva vegnir sanada per la stagiun d'enviern 2024/25. In incendi grond l'october 2025 ha dentant destruì quels plans e rendì necessaria ina nova construcziun cumpletta.
Nova finanziaziun
Fertant che las assicuranzas cuvran la gronda part dals custs, restavan 1,125 milliuns francs betg cuverts. Grazia al Gea da la populaziun da Flem pon quels ussa pia vegnir finanziads cun il credit supplementar. Ils custs totals per la nova construcziun da l'ustaria a Foppa muntan a 5,125 milliuns francs.
Suenter la votaziun da la sonda, il prim da zercladur, pon las lavurs da construcziun ussa cumenzar l'avust. La nova ustaria da muntogna duai lura esser pronta sin la stad 2026.
Contract da dretg da construcziun cun Mira Val Flims AG
En il rom da sia strategia spaziala ha la vischnanca da Flem fixà sco finamira centrala il mantegniment e la cuntinuaziun da l'infrastructura d’hotels. La midada da zona en ina zona da manaschi d'alloschi duai promover la construcziun d'hotels novs e rinforzar l'utilisaziun turistica da la regiun.
Cooperaziun e detagls dal contract
La societad d'aczias Mira Val Flims AG – che vul bajegiar in nov hotel – è gia en il possess dals dus hotels Chesa e Mira Val. Per pudair investir en l'object planisà han ils investurs duvrà duas parcellas che tutgan a la vischnanca da Flem. En in emprim pass aveva la populaziun gia approvà la midada da la zona pertutgada en ina zona d'alloschi ed hotellaria.
Il prim da zercladur ha la populaziun, en in segund pass, pia era detg Gea e concedì il dretg da bajegiar a la Mira Val Flims AG – quai dentant cun in stgars gie da 54%, sulet 70 vuschs han fatg la differenza.
Ina raschun per quella decisiun pli stgarsa sa esser che la populaziun dat paisa al spazi d'abitar per indigens. Las parcellas che s'audan al la vischnanca fissan stadas avon la revisiun dalla planisaziun locala a disposiziun per quai intent, dentant ussa gida il project dil hotel al svilup turistic ed economic
Il contract da dretg da construcziun concludì a la Mira Val Flims AG, prevesa ina durada fin l'onn 2104. Ils iniziants ston avair inoltrà la dumonda da bajegiar entaifer dus onns suenter che la revisiun da la planisaziun locala è ida en vigur, uschiglio scroda il contract puspè. Il project vegn vis sco in impuls impurtant per l'economia locala.
-
Bild 1 von 3. Hotel cun plazza publica sin la Promenada. Bildquelle: Vischnanca da Flem.
-
Bild 2 von 3. Plaunterren public cun bar e restaurant. Bildquelle: Vischnanca da Flem.
-
Bild 3 von 3. Bar / club per occurrenzas publicas. Bildquelle: Vischnanca da Flem.
Perspectivas per l'avegnir
Cun la realisaziun dal project d'hotel duai la destinaziun Flem Laax daventar pli attractiva. Novs letgs d'hotel duain revitalisar il turissem e crear plazzas da lavur. La vischnanca vesa en la cooperaziun cun la Mira Val Flims AG ina schanza da stgaffir purschidas d'alloschi innovativas e da qualitad auta.