Per l’emprima giada vegn organisada ina cursa da passlung a Flond/Sursaissa. L’idea è da porscher in'attracziun tant per ils turists sco era per indigenas e indigens. Fin uss è il dumber d’annunzias per las cursas da venderdi ils 3 da favrer plitost mediocher, di Toni Cadonau, ch'organisescha las cursas per Surselva Turissem e la vischnanca da Sursaissa-Mundaun. Tuttina hajan els uss 30 annunzias e quai fetschia plaschair, era sche 50 fissan stadas optimalas, di il magister da passlung.
La cursa è simpla e per mintg’in
L’idea saja da far ina purschida attractiva per mintgin. Che la giuventetgna che va cursas per puncts na participeschia betg ad ina cursa da plausch, saja anc da chapir, ma el vessi spetgà dapli annunzias d’uffants e giuvenils, di Toni Cadonau. Uss fetschian els la cursa e per l’auter onn vegnan els a guardar sco ch'il resun è la fin. S’annunziar per la cursa possian ins fin ch’ella cumenza il venderdi a las 17:00. Ideal fiss dentant da vegnir ad uras e currer simplamain spontan questa cursa ed alura anc giudair ina bella saira, di Cadonau.
In’emna pli tard inscunter cun stars
Ina emna pli tard, ils 10 da favrer, vegn era organisà a Flond in inscunter cun ils dus anteriurs sportists da professiun, Carlo Janka e Toni Livers. Els vegnian a discutar sur da differents temas, sco per exempel la preparaziun sin las cursas ni era sco sa nutrir a moda ideala. Era quai saja ina emprova ed el speria fitg che blers vegnian a tadlar la discussiun, era possian ins tschentar dumondas. L’idea è surtut da gidar ils giuvenils da sa sviluppar emporta betg sch’els vegnan profis ni betg, di Peter Cadonau.