Siglir tar il cuntegn
Inhalt

Surselva Flurin Caduff – cun schlantsch a l’opera da Turitg

Il chantadur Flurin Caduff da Danis chanta quest fin d'emna per l'emprima giada a l'opera da Turitg. En il teater musical per uffants «Konrad, u l’uffant or da la stgatla da conservas» gioga el ina rolla dubla.

Legende: Video Premiera per Flurin Caduff abspielen. Laufzeit 03:07 Minuten.
Or da Telesguard dals 21.09.2018.

Il cumponist renumà Richard Wagner ha ditg ina giada: «La musica è il linguatg da la passiun.» Ed in che viva ora quella passiun cun daletg è il chantadur d’opera Flurin Caduff. L'um ch'è naschì a Danis, stat cun sia famiglia a Lucerna. Là lavura el en l’ensemble dal teater da la citad. Uss ha el survegnì la pussaivladad da chantar e giugar en in toc da musica per uffants a l’opera a Turitg. El sa legra fitg e vesa quella schanza sco proxim pass en sia carriera musicala.

Ina rolla dubla, ina detga preparaziun

Flurin Caduff cun la vusch da bass-bariton ha cun ses 39 onns gia giugà en passa 50 producziuns e projects musicals. A Turitg, gioga el en il teater musical per uffants «Konrad, u l’uffant or da la stgatla da conservas». Sias rollas èn quella dad «Egon» e quella da «Frau Rusika» – pia ina rolla dubla. Per il bab da dus uffants munta quai dapli preparaziun.

Jau chant gugent e sch'ins sa giugar vitiers è quai insatge che dat a mai blera cuntentientscha.
Autur: Flurin CaduffChantadur dad opera

Cun schlantsch envers la premiera

L’um grond cun la barba naira resta calm, malgrà che la davosa emna avant la premiera è la pli pretensiusa. Sia finamira è clera: «Far ina buna parita». El va cun plaschair envers la premiera e spera, ch’i savess dar or da quest engaschi novas pussaivladads per ses futur musical.

TSG 17:40 / RR actualitad 08:10