Gia per la sisavla giada ha gì lieu questa fin d'emna sin il plaz da golf a Selva, il pli sisum la Surselva, in turnier da «footgolf». Enstagl da sajettar las ballas pitschnas cun in bastun per la cuntrada enturn per tutgar las rusnas pitschnas cun uschè paucas fridas sco pussaivel, fan quai enturn 100 atlets ed atletas da prest tut il mund cun in bal ch'ins dovra normalmain per dar ballape.
Quai ves'ora in zic sco ils culps libers tar ils gieus da ballape, mo sin la plazza da golf. E per ils bals da ballape che ston la finala sa tschentar sco tar il golf en ina rusna han ils responsabels furà rusnas adattadas en il green.
Adina dapli participantas e participants
Cumenzà a dar ballape sin plazzas da golf han ils iniziants avant passa 20 onns. Vegnivi lura giugà sulet en paucas naziuns, è il gieu ussa sa derasà en 53 naziuns ed enfin l'Argentina. I dat campiunadis naziunals, europeics e fingia era mundials. Per participar a campiunadis dovri ina licenza ed i dat era qualificaziuns naziunalas.
Nus n'essan betg uschè lunsch davent da daventar in sport olimpic. Quai na vul anc betg dir che nus giugain gia ils proxims gieus olimpics. Quai muntass dentant che nus essan in sport renconuschì e gidass tar la finanziaziun.
Per il turnier a Selva han ils responsabels prendì a fit la plazza da golf per trais dis. Tar il foot golf dovri buna gnerva ils muments decisivs. Cun ristgar dapli pon ins far bun intgins puncts. Mintgatant, cura che la tensiun è auta, fai schont sguzias en il corp.
Insacura in gieu olimpic
Finamira dals iniziants è che lur sport daventia in sport olimpic. Sche quai daventass in di realitad, lura fissi era pli simpel da finanziar las occurenzas
Novitads, eveniments ed istorgias localas. Tut tge che curra e passa en la Surselva chattais vus qua.
