Disla era ina giada in lieu industrial. Uschia deva quai sin in pitschen intschess ina resgia, in fallun (per smatgar sems da glin) ed in mulin per mular graun. Tut quai funcziunava cun la forza d’aua. Dapi il 1995 ha l’uniun «Mulin – Fallun – cascharia Disla» cumenzà cun la restauraziun. L’emprim da la chascharia e dal fallun, pli tard dal mulin e la resgia. Quai en lavur cumina e cun l’engaschi dals commembers, di Valentin Bisquolm il president.
Farina da Disla è tschertgada
La farina che vegn mulada en il mulin a Disla è tschertgada. Uschia vulan persunas privatas da quasi l’entira Svizra cumprar farina da là. La differenza saja ch’els molian crap sin crap, e quai laschia alura in gust tipic, di Valentin Bisquolm che presidiescha l’uniun cun var 140 commembras e commembers. Mintga duas emnas vegnia mulà fin a 70 kg graun ed era vendì per pudair finanziar tut las restauraziuns.
Nov bajetg e forsa anc dapli
Durant il temp da pandemia ha l’uniun realisà in bajetg sco magazin. «La Truasch» saja vegnida fatga cun tualettas publicas e cun ina stanza pitschna. En quella possian els emplenir la faraina mulada ed era mussar fotografias veglias. Quai saja impurtant per las gruppas che vegnian a guardar ils cundrizs. Ch'i saja savens era gruppas cun persunas giuvnas che vegnian a guardar, dettia speranza ch’era la generaziun che vegn suenter apprezieschia la tecnica da pli baud, di Valentin Bisquolm. Per pudair prender invista en las localitads vegn organisà in di da las portas avertas, la sonda ils 21 d'avust.