Siglir tar il cuntegn

Header

audio
Dieta da giuventetgna: Tge spetga la giuventetgna?
Or da Actualitad dals 30.08.2022.
laschar ir. Durada: 3 minutas 17 Secundas.
cuntegn

Franar la depopulaziun Sfidas per la giuventetgna èn savens las medemas

Plazzas da lavur, abitaziuns pajablas e bunas colliaziuns dal traffic public, las pli impurtantas tematicas per la giuventetgna muntagnarda. Per chattar soluziuns èn radund 60 persunas s'inscuntradas ad Andermatt per discussiunar.

Radund 60 persunas han discutà sur da las sfidas per las regiuns da muntogna durant ina dieta organisada da la Gruppa svizra per la regiun da muntogna (SAB) ed il Forum da giuventetgna da la SAB. Surtut il svilup demografic cun il fatg ch'igl ha blera glieud veglia è in grond tema e perquai co porscher a la giuventetgna u a giuvens creschids cundiziuns idealas. Surtut il barat tranter la giuventetgna saja impurtant, e ch’ins sentia er il sustegn da la vart da la vischnanca, uschia Sarina Caduff, presidenta dal Forum da giuventetgna.

Tujetsch è la quarta vischnanca grischuna cun il label

La vischnanca da Tujetsch è la quarta vischnanca grischuna che survegn il label «vischnanca attractiva per la giuventetgna». Il label vegn surdà da la Gruppa svizra per las regiuns da muntogna SAB. Per il suprastant Daniel Schmid è il label ina schanza per la vischnanca. Il label onurescha vischnancas nua che la giuventetgna po cundecider l'avegnir. Uschia pon giuvnas e giuvens sviluppar l'avegnir en regiuns muntagnardas e gidar da franar la depopulaziun. En tut fan 30 vischnancas part a quest label. L'emprima giada è il label vegnì surdà il 2015.

Represchentants da la giuventetgna

Tujetsch ha chattà dus delegads che represchentan la vischnanca e discuteschan temas e sfidas – er cun represchentants dad autras vischnancas en il Forum da giuventetgna da la Gruppa svizra per regiuns da muntogna SAB. Quai saja il bel vid quest project, di il suprastant da Tujetsch Daniel Schmid: Betg ils politichers, mabain la giuventetgna sezza discutescha ses avegnir en regiuns muntagnardas. Uschia vegnian avantatgs e mancanzas direct a la glisch ed ins possia agir.

audio
Tujetsch survegn label per engaschi cunter depopulaziun
ord Actualitad dals 26.08.2022.
laschar ir. Durada: 3 minutas 49 Secundas.

Sco exempel numna Daniel Schmid la vischnanca vallesana dad Albinen: Cunquai ch'i deva memia paucas abitaziuns per indigens èn naschids plirs projects per far frunt a quest problem – ensemen cun represchentants da la giuventetgna. In sumegliant project fiss era bun per Tujetsch, di Schmid.

Restar u suenter vegnir enavos?

Suenter l'emprendissadi en la regiun datti per la giuventetgna savens mo duas opziuns: Restar u ir en la Bassa a rimnar experientschas. Daniel Schmid conceda ch'i saja bain impurtant da far quest pass e da vesair insatge auter. Cura che la planisaziun da famiglia è lura dentant in tema, fetschian blers la ponderaziun – returnar u betg? Sche l’uffanza, il temp da scola ed il temp da giuventetgna restia en buna memoria, saja la schanza che la glieud returnia pli gronda. Gist quai emprovia la vischnanca da promover.

Propostas per franar la depopulaziun ordvart da la giuventetgna

Il Forum da giuventetgna sa cumpona da represchentants da las differentas vischnancas che han il label. Il gremi è era responsabel per surdar il label a vischnancas interessadas. Regularmain s’inscuntran las giuvnas ed ils giuvens e formuleschan communablamain propostas. La Gruppa svizra per las regiuns da muntogna SAB promova lura quellas propostas. La finamira è da barattar las meglras ideas per franar la depopulaziun. Daners directs per projects na survegnan las vischnancas betg.

Il label «vischnanca attractiva per la giuventetgna» è vegnì surdà gievgia saira a la vischnanca, quai durant la radunanza generala da la Gruppa svizra per las regiuns da muntogna SAB ad Andermatt.




Ord l'archiv

video
Cun la valisch en maun
Or da Balcun tort dals 19.05.1974.
laschar ir. Durada: 15 minutas 16 Secundas.
video
Testas finas – emigrants dal 21avel tschientaner
Or da Cuntrasts dals 07.03.2004.
laschar ir. Durada: 12 minutas 56 Secundas.

RTR actualitad 12:00

Artitgels legids il pli savens

Scrollar a sanestra Scrollar a dretga