Siglir tar il cuntegn

Header

video
Video vom 28.01.2016
Or da Actualitad video dals 28.01.2016.
laschar ir
cuntegn

Surselva Fugitivs minorens survegnan dimora a Glion

La regenza grischuna ha stgaffi ina purschida per requirents d’asil e fugitivs minorens. Uschia ha ella approvà in contract cun l’Uniun Casa Depouz a Trun. Dimora vegnan ils giuvenils a prender en il Albertushof, in edifizi da la claustra da Glion, quai communitgescha la regenza grischuna.

En la chasa d'abitar «Albertushof» duain vegnir tgirads dudesch giuvenils. In'extensiun a 16 persunas è pussaivla, scriva la regenza. Cun la purschida da l'uniun Casa Depuoz vegnan per regla tgirads giuvenils a partir dal 16. onn da vita. En vista ad ina concepziun da la vita autonoma ed economicamain independenta pon questas persunas profitar da questa purschida er sur lur maiorennitad or.

Fugitivs vegnan 1. da matg 2016

Il project a Glion vegn realisà da l' Uffizi dal survetsch social chantunal en stretga collavuraziun cun l’Uniun Casa Depuoz Trun. La vischnanca da Glion communitgescha che la finanziaziun vegn dal chantun, Ilanz/Glion ha pia da purtar nagins custs per la structura da dimora. Tar la gruppa da requirents d’asil e fugitivs avisada tutgan primarmain giuvenils masculins betg accumpagnads en la vegliadetgna da 16 fin maximalmein 25 onns enfin ch’els han terminà ina emprema scolaziun professiunala. Igl è la finamira che quests giuvenils èn fin lura en il cas da furmar lur vita en atgna reschia e senza agid economic d‘ordaifer. L’avertura a Glion è previda sin l'emprim da matg 2016.

Scolaziun a Cazas

Durant il di frequentan ils giuvenils il mument curs da lungatg e da furmaziun a la scola St. Catherina a Cazas. Il process d’integraziun vegn dirigì dal post specialisà per integraziun dal chantun Grischun. Il plazzament en l' Albertushof porscha ina structura da dimora e duront las fins d’emna e las vacanzas da scola ina structura dal di als giuvenils (incumbensas en il tegnairchasa, agid cun far pensums, sport ect.). Plinavant vegn ina persuna dal fatg da la Casa Depouz ad esser preschenta durant 24 uras.

Gia il settember 2015 aveva il chantun concludì ina incarica da prestaziun analoga cun la fundaziun "Gott hilft" per realisar ina purschida d'abitar e da tgira.

RR novitads 9:00

Glion infurmescha populaziun

Las autoritads communalas èn vegnidas infurmadas ad uras davart il project. Per infurmar abitantas ed abitants envida la suprastonza communala ad in‘occurenza d’informaziun che ha liug mesemna, ils 3 da fevrer 2016, allas 20.00 en l’aula da la chasa da scola a Glion.

Artitgels legids il pli savens

Scrollar a sanestra Scrollar a dretga