Siglir tar il cuntegn

Header

cuntegn

Surselva Fundaziun per la Therme Vals è sin via

La vischnanca da Val s. Pieder cumpra enavos la terma per metter quella en ina fundaziun. Il pretsch da cumpra per il bogn termal da Peter Zumthor è in franc simbolic.

Per Remo Stoffel, il possessur dal «7132 Hotel Therme» na mida nagut. El resta vinavant il sulet che sto far las investiziuns necessarias en quest bogn.

Per pudair cumprar enavos il bogn termal ha la vischnanca stuì prolungar il termin da cumpra. Quel fiss numnadamain scadì la fin da l'onn 2014. Ussa ha la vischnanca peda in onn e mez per questa fatschenta, quai è circa il temp che la vischnanca aveva pers cun tut las dispitas avant dretgiras pervia da la vendita dal Hotel Therme.

Ils proxims pass

En in segund pass sto la vischnanca contractar cun ils possessurs che avevan a sias uras dà il terren da bajegiar per la terma. Quai èn quatter possessurs che ston dar lur consentiment.

Co la fundaziun ha la finala num, tgi che vegn a manar ella e tge cumpetenzas che quella vegn ad avair n' è anc betg definì. Per Stefan Schmid, il president da la vischnanca da Val s. Pieder, va i ussa per la midada en il cudesch funsil. Quai è la basa per insumma pudair realisar la fundaziun per la Therme. Tut en tut saja quai in act simbolic per mussar che la terma tutgia vinavant a la vischnanca.

Artitgels legids il pli savens