Siglir tar il cuntegn

Header

audio
Canorta Mustér survegn premi dotà cun 20'000 francs
Or da Actualitad dals 09.11.2022. Maletg: RTR
laschar ir. Durada: 2 minutas 32 Secundas.
cuntegn

Fundaziun Pestalozzi Premi per canorta Lumpazi a Mustér

Per la 5avla giada vegn surdà il premi per la promoziun tempriva en regiuns da muntogna. 11 instituziuns eran annunziadas, or da tschintg ha ina giuria tschernì la canorta Lumpazi a Mustér per il premi principal. Quel è dotà cun 20’000 francs. Il mument tgira la canorta Lumpazi en tut 63 uffants, da quai dentant betg sulettamain uffants che vegnan en la canorta, quai èn 52, mabain tuts er quels da la maisa da mezdi, di la comanadra Lisa Giorgio. Per l’emprima giada hajan els uss ina glista da spetga per ils uffants.

Quai mussia bain che la purschida è tschertgada ed appreziada, quai ch’era a l’entschatta auter. Là devi sceptica surtut perquai ch’ins n’enconuscheva betg la purschida ed er las tattas ed ils tats hajan percurschì quai sco concurrenza, ma uss saja la purschida acceptada.

Canorta sco patrun da lavur impurtant

Cun en tut nov emploiadas è la canorta Lumpazi quasi in'interpresa da grondezza mesauna en la regiun. La stad passada hajan ins anc engaschà persunas supplementaras, uschia èn il mument duas giuvnas en la scolaziun e sis èn emprendidas, ma quai na tanschia betg, di Lisa Giorgio. En la periferia saja quai dentant anc pli grev da chattar persunas adattadas, quai sentian els gia dapi l’entschatta. Cun ils daners che vegnan dal premi Pestalozzi veglian els sustegnair il fond communabel cun la gruppa locala da Lions. Or da quest fond vegnan daners per famiglias che na pon betg purtar ils custs per la canorta, di Lisa Giorgio. In'autra part dals daners saja per la scolaziun dal persunal e la finala veglian els er cumprar novs termagls.

Premi da reconuschientscha er per autras canortas en il chantun

In premi da renconuschientscha, dotà cun 5'000 francs, survegn il center da sentupada da famiglias a Churwalden, la Kita Luerluogi e Val San Pieder, e la gruppa da giugar e da guaud en Valragn.

Intginas regiuns han, autras n'han nagina

Entant che la canorta Lumpazi vegn undrada per sia lavur en la regiun han autras regiuns sco la Val Müstair anca adina da desister d’ina tala purschida.

video
Intginas regiuns han bleras canortas, autras naginas
Or da Telesguard dals 09.11.2022.
laschar ir. Durada: 3 minutas 26 Secundas.

RTR Telesguard 17:40

Artitgels legids il pli savens