Ma era lavurs da biro tutgan tar il mintgadi dal funtaner. Pia l'emprim ch'il funtaner fa la damaun baud è ir en biro. Qua guarda el sin il plan digital sin ses computer. Sin quest plan vesa el l'entira construcziun d'aua dal cumin Laax. Cun quest plan po el guardar sch’i dat problems cun lingias u auter incaps. Ultra da quai po el reglar il livel d'aua dals reservuars.
Cura che la lavur da biro è fatga, fa il funtaner las lavurs ordavert. Tar questas lavurs tutgan las controllas dal manaschi dals reservuars sco era da la tschiffada d'aua. Controllas dals begls ed idrants en vischnanca u prender provas da l'aua.
Dischinfectar il reservuar
Ina giada ad onn datti ina lavur speziala. Lura vegn schubregià ora l'entir reservuar d'aua da baiver per pudair garantir che l'aua resta schubra. Il reservuar vegn sprizzà ora cun aua e suenter dischinfectà. Lasuenter vegn il reservuar puspè emplenì cun aua.
Gronda responsabladad
Per ina vischnanca ch'ha enfin tar 12'000 abitantas ed abitants l'enviern, na dastgi betg dar ina fallada reclama da schlett'aua. Perquai ha la plazza ina gronda impurtanza.
Il funtaner Simon Caviezel saja pertschert da sia responsabladad per la populaziun da Laax. La stagiun auta saja el forsa anc in zic pli pertschert, cunquai ch'anc dapli glieud dovra lura l'aua dal reservuar.
In gir cun il funtaner
Il reservuar Casti sco er ils ulteriurs trais reservuars a Laax controllescha Simon Caviezel mintga duas emnas. El mira ch’i na dagutta nagliur, ch’ils ventils na perdan betg l’aua, che la temperatura e l’umiditad sajan en urden. Suenter questa stad bletscha e frestga saja il reservuar emplenì bain.
Il quantum d’aua è segir qua. Ussa vegn surengiu tut quai che va. Uss n'hai jau nagins dubis da betg avair avunda aua.
La gronda quantitad d’aua sa mussa era tar in aual. Quel cula suenter intgins dis da plievgia fermamain, malgrà ch’ins vesess el atgnamain pir puspè l’atun, cura ch’igl è pli bletsch. Ed era tar la tschiffada d’aua Manul cula tanta aua, ch’ina part va surora ed enavos en l'aual. Radund 1'000 liters aua per minuta culan en questa tschiffada.
Collavuraziun tranter vischnancas
Suenter ina perioda sitga èsi pussibel che l'aua vegn stgarsa. Per tals cas è la vischnanca da Laax preparada, lura vegnan las vischnancas vischinas sin il radar.
