Ditg hai vesì ora sco sche la fusiun tranter Laax, Schluein e Sagogn na fiss betg fitg dispitaivla. Ils davos dus mais èn ils adversaris da la fusiun dentant sa mussads e cumbattan – almain a Laax – vehement cunter la fusiun.
Preschentaziun dal contract da fusiun ha procurà per visibilitad
Durant l'entir temp da contractivas e tut las infurmaziuns publicas organisadas da las vischnancas pertutgadas n'èn ils adversaris d'ina fusiun betg sa mussads avertamain. Cun la preschentaziun dal contract e da la cunvegna da fusiun a chaschun da las radunanzas communalas la fin da november e l'entschatta da december èn il adversaris vegnids or da la sumbriva. Per l'emprima giada hai dà alura resistenza visibla cunter ina fusiun.
A Laax è il cumbat fitg intensiv il mument. Brevs da lecturs inundeschan las gasettas. Placats vegnan montads dals ins e stgarpads davent dals auters. En il mument surprendan las emoziuns e betg pli ils arguments.
A Schluein e Sagogn è il cumbat pli decent. Las opiniuns èn fatgas. Il di da votaziun po vegnir. Ils 27 da schaner decidan ils suverans da las trais vischnancas co vinavant. Tut è anc pussaivel.
