Siglir tar il cuntegn

Header

La baselgia a Surrein.
Legenda: La baselgia a Surrein. RTR, H. Giger
cuntegn

Surselva Fusiun da trais plaivs a Sumvitg

Las trais plaivs da Rabius, Sumvitg-Cumpadials e Surrein ston fusiunar. Il motiv è che la Baselgia chantunala dat pli paucs daners.

Senza ina fusiun survegnissan las trais plaivs mo pli 62'000 (fin uss era quai tranter 165'000 – 195'000 francs). Cun quests daners na pudessan els betg pli subsister, ha il coordinatur da la fusiun Armin Candinas ditg ad RTR. Suenter la fusiun datti mintg’onn ca. 137'000 francs per la plaiv nova da Sumvitg. Vitiers vegn che la Baselgia chantunala dat ina contribuziun unica da 430'000 francs per la fusiun.

Votaziun ils 5 d'avrigl

Il messadi cun il contract da fusiun è vegnids tramess quests dis en las chasadas. Ils 23 da favrer datti ina saira d’orientaziun ed ils 5 d’avrigl pon ils parochians da mintga plaiv votar en ina radunanza generala. Ina cundiziun è che mintga plaiv di gea a quest project.
L’atun 2016 è la radunanza generala constitutiva. Alura vegn elegì la nova suprastanza da la Plaiv Sumvitg ed ils preschents ston era approvar la constituziun, leschas e reglaments. La fusiun duess ir en vigur cun l’entschatta da 2017.

RR novitads 6:00

Artitgels legids il pli savens

Scrollar a sanestra Scrollar a dretga