Il schaner 2019 han las duas vischnancas da Trun e Sumvitg lantschà in project da fusiun. La pandemia ha dentant retardà in zic quest project.
Populaziun dastga discutar sur dal sboz
Els hajan creà 9 gruppas da lavur, e quellas hajan dà giu ina notizia d'acta. Las notizias sajan vegnidas surdadas als manaders dal project, Tino Zanetti (cussegliader da vischnancas) e Kevin Brunold (manader da fatschenta da Surselva turissem SA). Ed els hajan elavurà in sboz per in messadi, di il president da vischnanca da Sumvitg Armin Candinas.
Quest sboz duai vegnir preschentà a la populaziun, uschè spert ch’ins dastga organisar radunanzas d’infurmaziun pli grondas. E la populaziun po discussiunar sur dal sboz da fusiun.
Tge num?
In punct che pudess dar da discutar è il num da la vischnanca fusiunada. Il num saja adina in impurtant factur tar ina fusiun.
Jau mettess avant ch’ella vess num Sumvitg-Trun u Trun-Sumvitg, in num dubel.
Sbassar pe da taglia
In auter factur impurtant è tenor il president communal da Trun, Dumeni Tomaschett las finanzas. Ina dumonda saja quants daners ch’i dettia da la gulivaziun da finanzas, perquai che quai haja in'influenza sin il pe da taglia.
La finamira da fusiunar è ch’il pe da taglia va engiu e betg ensi.
I na va betg spert
Tino Zanetti fa attent ch’ins na dastga betg quintar che questa fusiun giaja spert, era sche Sumvitg e Trun lavurian gia ensemen. I sajan tuttina duas vischnancas differentas cun duas filosofias differentas.
Per Simon Theus da l’uffizi chantunal da vischnancas fiss quai ina fusiun che fetschia senn. Ma i dastgass ir in zic pli spert.