Giuanna Candinas ha 75 onns e viva a Surrein. Per cas urgents dovra ella in telefonin, ma dapli tecnologia na vul ella betg.
Jau na vul betg quest internet en chasa, fertig. La glieud è adina vid guardar en l'internet e quai na plascha betg a mai.
Midadas tar La Posta
Mintgatant fiss l'internet dentant tuttina flot. Cunquai che Surrein n'ha nagina filiala da La Posta pli en il vitg, datti là il servetsch da chasa. Da nov sto quel vegnir clamà via internet ubain analog cun in scanner. Questa midada ha dà da discutar en il vitg.
L'uniun da dunnas s'engascha
La presidenta da l'uniun da las dunnas, Giuanna Albin, ha decidì da gidar. Ella ha organisà in pitschen curs davart quest nov sistem.
Jau hai sentì che questa midada chaschuna quitads tar las senioras ed ils seniors en il vitg. Jau vi gidar e mussar che quai n'è nagin striegn.
Tranter analog e digital
I dettia ina sfessa tranter analog e digital en la societad. Quai badan ins tar novas chaussas. L'emprim contact cun ina tala, stoppia esser positiv, di la perscrutadra da la Scola auta spezialisada dal Grischun, Kerstin Wagner. En il cas ideal succedia quai cun ina persuna che mussia.
I dovra ina persuna che gida da surmuntar l'obstachel dal nov. Sche quai succeda, alura vegn tut pli simpel.
surmuntà ils dubis
Quai mussa era l'exempel da Surrein. Suenter paucas minutas han Giuanna Candinas e sias collegas chapì, co quest nov apparat funcziuna. Ma ella saja tuttina cuntenta, ch'ella na dovria en futur nagin internet per empustar il postin.