Siglir tar il cuntegn

Header

cuntegn

Surselva Georges Reber va a pe dal Lai da Tuma fin Rotterdam

L’um da 63 onns vul far mintga di 20 fin 25 kilometers, e marschar 4 fin 6 uras. Fin a Rotterdam sto el far circa 1'500 kilometers. En quatter mais, insacura il december, quinta el d'arrivar al lieu nua ch’il Rain sbucca en la mar.

Respect da la gronda tura

El haja savì che quest mument vegnia in di, e perquai n'ha el betg fatg memia blers patratgs, raquinta Georges Reber. Mo el haja respect da questa lunga tura. En ses satgados prendia el la rauba ch’ins dovra cura ch’ins fa ina tura pli lunga: resti, pulvra da lavar resti e las chaussas da tualetta. Spezial saja sulettamain ch’el prendia cun el ina buttiglia pitschna. En quella haja el emplenì aua dal lai da Tuma, e quest’aua veglia el alura svidar en la mar a Rotterdam.

audio
Bunura: Vianda dal lai da Tuma a Rotterdam
ord Actualitad dals 18.08.2018.
laschar ir. Durada: 2 minutas 44 Secundas.

Far insatge suenter la pensiun

Dapi l’avust saja el pensiunà, di l’um da 63 onns. El saja anc bun en gamba ed el vuless anc far insatge, suenter ch’el ha chalà da dar scola. 33 onns ha el instruì tudestg e teater al gimnasi da Reussbühl sper Lucerna. Georges Reber è naschì a Cuira, ils emprims onns da sia uffanza ha el passentà a Domat ed alura è sia famiglia sa retratga a Lucerna. Suenter la matura ha el studegià germanistica a Friburg e Minca.

In motiv ch’el fa ses viadi è era la colliaziun ch’el ha cun il Rain, er entras la litteratura tudestga. Rumantsch discurra el anc adina cun ses parents ed enconuschents en il Grischun.

Nagin connex cun il project da Ernst Bromeis

Il project cun ir a pe dal lai da Tuma fin a Rotterdam regorda al project dad Ernst Bromeis e ses miracul blau. Quel è nudà il medem toc. Mo ses project n'haja betg in connex cun quel da Bromeis, di Georges Reber. El fetschia quai per motivs persunals, l’idea saja dad ir d'in lieu a l’auter senza chalar. El na sappia dentant betg sche quai funcziuneschia. Quai dependia era sche las chommas tegnian, e sch’i na schabegia betg insatge.

RR actualitad 07:00

Artitgels legids il pli savens